Pamontosan

Sayana a mala a tanto a mipezalimbetad o tao opama ka phakimasaanon so manga malaikat sa Naraka sii ko kapesiksaa iran ko manga tao ron, so karangit o sosogkhayaw a apoy, so pakabetha-bethang a kaphapadaw o manga masisiksaon, so di khabaraw a kaperego-rego ago kapenggoraok iran, so kaphanalobaa iran ko manga kaginawa iran ago so kathataropesik iran mamangni a makakasoy siran sa donya.

Da den a angan-angan saya, na mipezalimbetad den aya o tao, khaator iyan den so intiro a kaphaginentao niyan. Apiya pen a aya kamataanan iyan na so kadandan o pagtao na di iran itatapian a giyaya a kabenaran, na di den aya makasendod ko tao ko kaphanagontaman iyan ko kalango-langowan a bager ago kapakagaas iyan a para bo ko Mawri-Alongan. Maylay ka siran den a mananamar ko kaphalagoyi iran ko langon a manga dadabiyatan a ipekhagowad kiran o Allah, ago maylay ka siran den a kazasakoya iran ko kanggagalebek sa manga-pipiya a amal sa taman sa pekhagaga iranon. Maylay ka siran den a tanto a ka-aalekan ko kapamimikirana bo a ba siran makanggolawla sa miyakaito-ito bo a kapakasopak o di na makatharo bo sa isa-taga a marata a basa a khasabapan ko kakhaposang o tao sa Apoy sa Naraka. Maylay ka siran den a mamagapas sa magaan ko Allah a pethatawbat ago phamamangni sa maap Rekaniyan. So miyailay iran a manga betad ago miyangaaneg iran roo na di den mapokas sa manga pamikiran iran, a khasabapan sa tatap a kapelindong iran ko Allah poon sa giyoto a manga lagid iyan a betad.

Aden makowa so babaya o Allah ago aden makalidas ko kasiksaan Iyan na giyanan a tao na iphanagontaman iyan so tenday a kawyag-oyag iyan, so tamok iyan ago so bager iyan para ko lalan o Allah. Aya mala saya na so kaphantang ago kapanagontaman taman ko kapatay, na apiya so den so pinakamaregen na phakalebod. Da den a baon phakabimban ko panagontaman iyan, ago di niyan phagalang-alangan so kakowaa niyan ko ikasosoat o Allah. Langon-taman a okit na phagosaren iyan asar a makanggona sekaniyanon sa Mawri-Alongan. o antonaa man i pesowaen o manga ped a tao, o antonaa i kaphaginentao iran ago apiya antonaa pen i manga kepit iran na da den a labot iyanon. So langon a bager iyan ago so langon a kapakagaas iyan, na iperasa-rasay niyan aya para makowa niyan so singanin iyan a babaya o Allah ago so ikasosoat Iyan. So kitatapien iyan ko manga sogoan ago manga tapaos o Allah, na iphanolon iyan mambo aya ko manga ped a tao, a iphangosiat iyan aya ago iphanapaos iyan ko oman i mithoona iyan makapantag ko kabenaran o kawyag-oyag o manosia. So pinakamala a singanin iyan ago so antap a kawyag-oyag iyan na so kaparolia ko kingginawain niyan ko Allah, a tarotop a ipangongonot iyanon a ginawa niyan Rekaniyan. Khaalong rekaniyan so kalek a inipharas sa Qur’an:

“… Na mataan! a aden a sabaad ko manga wator a pephakambowaton so manga lawas-a-ig, ago a aden a sabaadon a amay ka inopak na pephakagemaw ron so ig, Ago so sabaadon na penggaled sabap ko kalek ko Allah…” (Surat al-Baqara: 2:74)

Opama bo ka benar den a sabap ko da tano kailaya ko Naraka, a miyakaren ko sabaad ko manga tao poon ko kikhaaleken iran ko Allah, ago so kapephananggila iran ko kaphaginentao iran ko gawi-gawii, na kiyatangkaan den man so kiyapayagaon o Allah ko ka-aaden o Naraka sii ko madakel a manga ayat sa Qur’an, a iniphara-paras Iyan phiya-piya ago inipanapaos Iyan ko manga.

Na amay ka mawma so oras, na da den man a tao a di makamasa ko Naraka. So Allah na tanto Niyan aya a pakararayagen..Aya bo a phakalidason na so siranoto a aden a kalek iran ko Allah, na so sabaad na makandodola-dola ron den ko manga leb iran:

“Na da a isa rekano bo a baon di phakasagad: Giyanan i Kokoman a miyapasad a tiyakdir o Kadenan ka. Oriyan iyan na sabeten Ami so miyamananggila, na ibagak Ami roo so manga darowaka, a pekhidola iran a manga leb iran.” (Surah Maryam: 19:71-72)

Ogaid, na da den a baon pen khakowa a gona ko oriyan o kailaya ko Naraka sa masa oto, aya sabap iyan, na da den sa masa oto a baon kapakakasoy pen…