92. Al-Layl - قُرآن

• 1. رات جو قسم آھي جڏھن ڍَڪي ٿي.

• 2. ۽ ڏينھن جو (قسم آھي) جڏھن روشن ٿئي ٿو.

• 3. ۽ اُن جو (قسم آھي) جنھن نر ۽ مادي خلقي.

• 4. ته بيشڪ اوھان جي ڪوشش قسمين قسمين آھي.

• 5. پوءِ جنھن (الله لڳ) ڏنو ۽ پرھيزگاري ڪئي.

• 6. ۽ چڱائي کي سچ ڄاتائين.

• 7. تنھنکي (نجات جو) آسان رستو سھنجو ڪري ڏينداسين.

• 8. ۽ جنھن بخل ڪيو ۽ (پاڻ کي) بي پرواھ ڄاتائين.

• 9. ۽ چڱائي کي ڪوڙ ڀانيائين.

• 10. تنھن کي اوکائيءَ (۾ پوڻ) لاءِ (رستو) آسان ڪري ڏينداسين.

• 11. ۽ جڏھن اونڌو ڪرندو ته سندس مال کانئس (ڪجھ) نه ٽاريندو.

• 12. بيشڪ سڌو رستو ڏيکارڻ اسان تي (لازم) آھي.

• 13. ۽ بيشڪ آخرت ۽ دُنيا (ٻئي) اسان جي وس ۾ آھن.

• 14. پوءِ اوھان کي باھ کان ڊيڄاريم جا ڄڀي ڪري ٿي.

• 15. (اھڙي) وڏي نڀاڳي کانسواءِ (ٻيو) ڪو اُن ۾ ڪونه گھڙندو.

• 16. جنھن (اسلام کي) ڪوڙ ڄاتو ۽ پٺيرو ٿيو.

• 17. ۽ اُن (باھ) کان انھي وڏي پرھيزگار کي پاسي ڪبو.

• 18. جيڪو پنھنجو مال (الله جي واٽ ۾) ڏئي ٿو ته پاڪ ٿئي.

• 19. ۽ مٿس اھڙي ڪنھن جو ڪو احسان ٿيل نه آھي جو بدلو ڏجي.

• 20. پر پنھنجي تمام مٿاھين پالڻھار جي رضامندي طلبڻ لاءِ (ڏئي ٿو).

• 21. ۽ ضرور جلد خوش ٿيندو.