86. At-Tariq - قُرآن
- 1. آسمان جو ۽ رات جي وقت ۾ ايندڙ جو قسم آھي.
- 2. ۽ ڪنھن سمجھايئي ته رات جو ايندڙ ڇا آھي؟
- 3. (اُھو) چمڪندڙ تارو آھي.
- 4. ته ڪو جيءُ اھڙو ڪونھي جنھن تي ھڪ نگھبان مقرر ٿيل (نه) آھي.
- 5. تنھنڪري ماڻھوءَ کي گھرجي ته نھاري ڏسي ته کيس ڇا مان بڻايو ويو آھي.
- 6. ٽپي سان نڪرندڙ پاڻي مان بڻايو ويس.
- 7. جو پُٺيءَ ۽ اُرھ جي وچ مان نڪرندو آھي.
- 8. بيشڪ الله سندس وري موٽائڻ تي وس وارو آھي.
- 9. جنھن ڏينھن (ماڻھن جي دلين جا) سڀ ڳُجھ جاچيا ويندا.
- 10. پوءِ تنھن ڏينھن ڪانه اُن کي سگھ رھندي ۽ نڪو واھرو (ھوندس).
- 11. ۽ مينھن واري آسمان جو قسم آھي.
- 12. ۽ ڦاٽن واريءَ زمين جو (به) قسم آھي.
- 13. ته بيشڪ قرآن ھڪ فيصلو ڪندڙ ڳالھ آھي.
- 14. ۽ ھيُ قرآن ڪا ٺـٺولي (جي ڳالھ) نه آھي.
- 15. بيشڪ ڪافر ھڪ (طرح جي) ڳجھي رٿ رٿين ٿا.
- 16. ۽ (آءٌ به) ھڪ (طرح جي) رٿ رٿيان ٿو.
- 17. پوءِ ڪافرن کي ڍر ڏي ۽ ٿوري مُدت کين ڇڏي ڏي.
